De littera P SHOW APPARATUS
| 417 | Inter Prudentiam et sapientiam. Prudentia in humanis rebus, sapientia in divinis distribuitur. |
| 418 | Inter Pudorem et pudicitiam. Pudor corporis est, pudicitia mentis. |
| 419 | Inter Pietatem et affectionem. Pietas inter devinctos sanguine exhibetur, affectio inter extraneos. |
| 420 | Inter Patientiam et tolerantiam. Tolerantia animi est patientia corporis. Ut Sallustius Corpus patiens inediae, algoris. |
| 421 | Inter Peritum, prudentem, callidum et facundum. Peritus usu doctus; prudens, veluti providens, utilis rerum futurarum ordinator; callidus, per exercitationem artis instructus; facundus, qui facile possit fari. |
| 422 | Inter Pudentem et verecundum hoc interest, quod pudens opinionem veram falsamque metuit: Verecundus autem non nisi veram timet. |
| 423 | Inter Profanum, et nefandum, et nefarium. Nefarius, ut Varro existimat, non dignus farre. Quo primo cibi genere vita hominum sustentabatur. Nefandus, id est, nec nominandus quidem. Profanus autem, cui sacris non licet interesse. De quo Sallustius: Sacra polluet profanus. Profanus ergo, porro, id est, longe a fano. |
| 424 | Inter Peccatorem et immundum, quod omnis peccator immundus est; non tamen omnis immundus peccator. Peccator enim est qui transgreditur praecepta Dei, et necesse est hunc et immundum esse quia transgreditur. Immundus autem est et qui cum uxore sua dormierit, aut mortuum tetigerit, non tamen ideo peccator est. |
| 425 | Inter Ploratum, planctum, et fletum. Ploratus tantum lacrymarum est, planctus tantum vocum, fletus ad utrumque pertinet. |
| 426 | Inter Pigritiam et torporem. Torpor dormitantis est, pigritia vigilantis. |
| 427 | Inter Perseverantiam et pertinaciam. Perseverantia in virtute est, pertinacia in vitio. |
| 428 | Inter Praesidium, auxilium et subsidium. Praesidium est aliquo loco utili positum, auxilium quod ab exteris datur, subsidium quod postea supervenit. |
| 429 | Inter potentiam et potentatum. Potentia est sui cuiusque solius, potentatus vero auctoritas est iudicialis. |
| 430 | Inter Pestem et pestilentiam. Pestis ipsum est nomen morbi, pestilentia vero id quod ex se efficit. Pestilentiae autem tres modi sunt: aut ex terra, aut ex aqua, aut ex aere. |
| 431 | Inter Passionem et propassionem Hieronymus in Matthaeum distinguit, dicens: quod passio reputatur in culpa; propassio, licet culpam habeat, tamen non tenetur in crimine. Ergo qui viderit mulierem, et anima eius fuerit titillata, hic propassione percussus est: Si vero consenserit, et de cogitatione affectum fecerit (sicut scriptum est in David: transierunt in affectum cordis), de propassione transit ad passionem, et huic non voluntas deest, sed occasio. |
| 432 | Inter Percunctationem et interrogationem Augustinus hoc interesse existimat, dicens: quod ad percunctationem multa responderi soleant, veluti quid est hoc, aut illud? ut respondeantur diversa, vel varia. Ad interrogationem non multa respondentur, sed aut non, aut etiam pronuntiabitur. Veluti factum dictumve est? Verum aut falsum est? Respondetur: aut non, aut etiam. |
| 433 | Inter Perfectum et consummatum hoc distat quod perfectum est cui iam addi nihil aliud potest. Consummatum vero est quodlibet opus in finem deductum. |
| 434 | Inter Patens et patulum. Patulum dicimus quod naturaliter semper patet, ut nares, arbor. Patens vero quod aperitur et clauditur, ut ostium, oculi. Sic lucidum et lucibile: lucidum est quod aliunde illuminatur, lucibile quod per se lucet. |
| 435 | Inter Penetrale et penetrabile. Quod penetrat penetrale dicitur; quod autem penetratur, penetrabile. Penetralia autem sunt domorum secreta, et dicta ab eo quod est penitus. |
| 436 | Inter Post et pone hoc videtur interesse quod post semper chronicῶs ponimus, cum dicimus: Post tempus veniam; pone vero, post tergum. |
| 437 | Inter precari, et imprecari, et deprecari. Precari est rogare, imprecari est optare, deprecari est excusare, vel expurgare. Cicero (lib. II in Verr.). Quid, inquit, faciat Hortensius? Avaritiaene crimina frugalitatis laudibus deprecetur? |
| 438 | Inter Poscere et exposcere. Poscere minus est quam exposcere. Nam poscunt qui simpliciter petunt, exposcunt qui desiderant. |
| 439 | Inter Polliceri et promittere. Polliceri dicimur quod sponte promittimus nec rogati, promittere quod petitur. Ergo promittimus rogati, pollicemur ultro. Item pollicemur scriptura, promittimus verbo. |
| 440 | Inter Properare et festinare. Marcus Cato sic distinguit dicens: Qui unumquodque mature transigit, is properat. Qui multa simul incipit, neque perficit, is festinat. Ego unumquodque quod adortus eram transigebam o. |
| 441 | Inter Primum et priorem. Primus e multis, prior e duobus, primarius a dignitate. |
| 442 | Inter Plures et pluris. Pluris est quod maiori summa laxatur, plures vero de multitudine scribimus. |
| 443 | Inter Petivit et expetivit. Petivit pro parum ponitur, expetivit pro satis petivit. Et inimicissime ac vehementer adnisus est. Ex enim pro valde ponitur. |
| 444 | Inter Pyram et rogum: Pyra est constructio lignorum, antequam ignis admotus est. Rogus est dum ardet. Bustum vero posteaquam arsit. |
| 445 | Inter Plebem et populum. Plebs a populo eo distat, quod populus est generalis universitas civium cum senioribus, plebs autem pars humilis et abiecta. |
| 446 | Inter Pauperiem et paupertatem, Pauperies damnum est, paupertas ipsa conditio. |
| 447 | Inter Proclivum et declivum. Proclivus est ascensus; declivus, descensus facilis. |
| 448 | Inter Puerperam et puellam. Puellam investem dici et aetate parvulam, quasi pullam; puerperam vero, quae primum puerum enixa est, et in annis puerilibus parit. Unde et Horatius : Laudantur simili prole puerperae. |
| 449 | Inter Pampineum et pampinosum. Pampineum est totum de pampinis, pampinosum quod pampinis plenum est. |
| 450 | Inter Populum et populos, cum enim populos numero plurali dicimus, urbes significamus; cum populum, unius multitudinem civitatis intelligimus. |
| 451 | Inter Pontificem et vatem. Pontifex tantum summum sacerdotem significat, vates autem plura significat, aut sacerdotes, aut poetas, aut prophetas. |
| 452 | Inter Profugum et exsulem. Profugus voluntate, exsul necessitate. |
| 453 | Inter Patrium et paternum. Paternum est quod patris fuit, ut fundus paternus. Patrius dicitur patri similis, ut patrius animus |
| 454 | Inter Proprius et propius. Proprius est nomen, propius vero iuxta me. |
| 455 | Inter Praegnantem et gravidam haec differentia est: praegnantem esse quae concepit; gravidam, quam uteri gravedo proximam partui ostendit. |
| 456 | Inter Pignera et pignora. Pignera sunt rerum, pignora filiorum et affectuum. |
| 457 | Inter Portentum et monstrum. Portentum est quod ex formis diversis proponitur, monstrum, quod extra naturam nascitur, vel nimis grande, vel nimis breve. |
| 458 | Inter Portentum et portentosum. Portentum dicitur quod ex omni parte naturae mutationem sumens aliquid portendere futurum videtur, sicut biceps caput in corpus unum, vel sicut in Xerxis regia ex equa vulpem ferunt creatam (Herodian.); per quod eius solvi regnum ostensum est. Nam portentosa dicuntur quae ex parte corporis sumunt mutationem; ut, exempli causa, cum sex digitis nati, sive cum aliqua pravitate membrorum. |
| 459 | Inter Portentum et ostentum. Portentum nascitur et in sua permanet qualitate; ostentum vero subito offertur oculis, et subducitur. Sic portentum dicitur a portendendo, id est porro ostendendo, sicut et prodigium, quod porro dicat, id est futura de longe praedicat. Monstrum sane a monitu vel monstrando dictum, quod aliquid significando demonstret et statim. Quinque sunt autem genera prodigiorum, ut Varro dicit, id est: portentum, ostentum, prodigium, miraculum et monstrum. |
| 460 | Inter Pueritiam et pubertatem. Pueritia est tenera et parva aetas, a puritate ita vocata; Pubertas autem aetas adulta est quae iam gignere potest; dicta a pube, id est a pudendis corporis, quod haec loca tunc primum lanuginem inducunt. Pueritia autem a septimo anno, pubertas a quarto decimo incipit. |
| 461 | Inter Percussum et perculsum. Percussum corpore dicimus, perculsum animo. Cicero, de Signis: Tanquam ipsa illa face perculsus esset. |
| 462 | Inter Parricidam et paricidam. Parricidam dicimus qui occidit parentem; paricidam, qui socium atque parem. |
| 463 | Inter Procellam et tempestatem. Procellas non tam terrarum quam coeli esse, tempestates autem fluctuum sunt. |
| 464 | Inter Plantas et plantaria. Quod plantae sunt raptae de arboribus, plantaria vero, quae ex seminibus nata sunt, et cum radicibus et terra propria transferuntur. |
| 465 | Inter Pomarium et pometum. Pomarium est ubi poma ponuntur, pometum ubi poma nascuntur, pomerium ubi poma inveniuntur. |
| 466 | Inter Pyram et pyrum. Pyra est rogus ardens, pyrum vero pomum. |
| 467 | Inter Piscatorem et piscarium. Piscator est qui capit, piscarius est qui vendit. |
| 468 | Inter Pulvereum et pulverulentum. Pulvereum, factum; pulverulentum est, pulvere plenum. |
| 469 | Inter Pennas, et pinnas, et pennum. Pinnae sunt murorum, pennae avium, a pendendo; pennum extremitas ferri acuti. |
| 470 | Inter Praedam, lucrum et compendium. Praeda ex hoste, lucrum ex negotio, compendium proprie ex pondere. |
| 471 | Inter Pompeii porticum, Pompeiam, et Pompeianam. Pompeii, est ipsius Pompeii; Pompeia, publicata; Pompeiana, si ad aliam domum transit. |
| 472 | Inter Populum et plebem. Quod populus est universus cum senatu et civibus Romanis, plebs tantum vilior numerus. |
| 473 | Inter Partem et partim. Partem nomen, partim adverbium est. |
| 474 | Inter Postremum et posteriorem. Postremus de multis, posterior de duobus. |
| 475 | Inter Principium et initium. Principium, prima pars; initium, uniuscuiusque rei incipientis coeptum. |
| 476 | Inter Pendent et pendunt. Pendent suspensi, pendunt aliquid ponderantes. |
| 477 | Inter Pene et pene. Pene adverbium est, pene turpissima pars corporis. |